FRIENDS OF KANNUR KUWAIT EXPAT'S ASSOCIATION, KUWAIT
Latest News  >> 

കുവൈറ്റിലെ കണ്ണൂർ നിവാസികളുടെ കൂട്ടായ്മയായ ഫ്രണ്ട്സ് ഓഫ് കണ്ണൂർ കുവൈറ്റ് എക്സ്പാറ്റ്‌സ് അസോസിയേഷൻ (ഫോക്ക്) പതിനാല് പ്രവർത്തന വർഷങ്ങൾ വിജയകരമായി പിന്നിട്ടിരിക്കുകയാണ്. കുവൈത്തിലും നാട്ടിലുമായി നിരവധി ജീവകാരുണ്യ പ്രവർത്തനങ്ങൾ നടത്തുവാനും, സാമൂഹിക-സാംസ്കാരിക കലാ കായിക മേഖലകളിൽ നിരവധി പ്രവർത്തനങ്ങൾ കാഴ്ചവയ്ക്കാനും ,സംഭാവനകൾ നൽകാനും സംഘടനയ്ക്ക് സാധിച്ചിട്ടുണ്ട്. ഫോക്കിന്റെ പതിനാലാം പ്രവർത്തന വർഷത്തിന്റെ വാർഷികാഘോഷം "കണ്ണൂർ മഹോത്സവം 2019" നവംബർ എട്ടിനു വെള്ളിയാഴ്ച്ച വൈകുന്നേരം 3 മണി മുതൽ കുവൈറ്റ് യൂണിവേഴ്സിറ്റി, ഖാൽദിയ്യ തീയേറ്ററിൽ വെച്ച് നടത്താൻ പോകുന്ന വിവരം ഏവരെയും സന്തോഷപൂർവ്വം അറിയിക്കുകയാണ്. മലയാള കലാരംഗത്തെ പ്രമുഖ കലാകാരന്മാരെ അണിനിരത്തിക്കൊണ്ട് നടത്തുന്ന ഈ മ്യൂസിക്കൽ മെഗാഷോയിൽ, മലയാള സിനിമ രംഗത്തു നിരവധി മനോഹരമായ ഗാനങ്ങളിലൂടെ സ്വന്തം വ്യക്തിമുദ്ര പതിപ്പിച്ച യുവ പിന്നണി ഗായകൻ കെ.സ് ഹരിശങ്കർ, വയലിൻ തന്ത്രികളിൽ രാഗങ്ങൾ തീർത്ത്‌ ആരാധകഹൃദയം കീഴടക്കി മുന്നേറുന്ന ആർട്ടിസ്റ്റ് രൂപ രേവതി, അവർക്കൊപ്പം മനോഹരമായ ഈണങ്ങൾ ചേർക്കാൻ കീബോർഡ്/ ഗിറ്റാർ ആർട്ടിസ്റ്റ് സുമേഷ് ആനന്ദും ചേരുന്നു. തുടർച്ചയായി എഴുപത്തിയെട്ടു മണിക്കൂർ നീണ്ട മാരത്തോൺ നോൺ സ്റ്റോപ്പ്‌ ഡ്രമ്മിങ്ങിലൂടെ ഏഷ്യൻ റെക്കോർഡ് കരസ്ഥമാക്കിയ ഡ്രമ്മർ ജാഫർ, മാപ്പിളപാട്ടിനെ എന്നും ഹൃദയത്തോട് ചേർത്ത് വച്ച് നമ്മുടെ നാടിനു അഭിമാനമായ മണ്മറഞ്ഞ അനുഗ്രഹീത ഗായകൻ ശ്രീ കണ്ണൂർ സലീമിന്റെ മക്കൾ സജില സലിം, സലീൽ സലിം തുടങ്ങിയ പ്രശസ്ത കലാകാരൻമാർ ചേർന്നു മനോഹരമായ സായാഹ്നം നിങ്ങൾക്കായി ഒരുക്കുന്നു . കണ്ണൂരിന്റെ അഭിമാനമായ സംഗീത കുലപതി, യശ്ശശരീനായ പത്മശ്രീ. കെ.രാഘവൻ മാസ്റ്റർക്കും മാപ്പിളപ്പാട്ടിന്റെ സുൽത്താൻ എരഞ്ഞോളി മൂസയ്ക്കുമുള്ള ഫോക്കിന്റെ ആദരവ് തദവസരത്തിൽ ഉണ്ടായിരിക്കുന്നതാണ്. കുവൈത്തിലെ കണ്ണൂർ നിവാസികളുടെ ഉത്സവമാമാങ്കത്തിലേക്ക് "കണ്ണൂർ മഹോത്സവം 2019 " ന് നിങ്ങളോരോരുത്തരെയും സഹർഷം ക്ഷണിക്കുന്നു സ്നേഹപൂർവ്വം സ്വാഗതം ചെയ്യുന്നു.

v